VOV4.Jarai - Ƀrô hrơi Tê̆t Bun Pi May dêh čar Lao hăng Chôl Chnăm Thmay dêh čar Kur, Khua dêh čar ơi Phạm Minh Chính iâu telephôn bơni hơ-ơč kơ Khua dêh čar Lao Phankham Viphavanh hăng Khua dêh čar Kur ơi Hun Sen. Amăng mông pơhiăp telephon hăng Khua dêh čar Lao Phankham Viphavanh, Khua dêh čar ơi Phạm Minh Chính bơni hơ-ơč kơ hơdôm tơlơi dưi ngă prong mơng Kơnuk kơna hăng Mơnuih ƀon sang Lao hơmâo ngă amăng bruă pok pơhai Tơlơi pơtrun jơnum ruah khua Ping gah tal 11 mơng Ping gah Mơnuih ƀon sang hơkrŭ dêh čar Lao hăng Akŏ bruă pơđĭ kyar bơwih ƀong huă - mơnuih mơnam 5 thun tal 9; pơdah tơlơi đăo gơnang, yŭ tơlơi git gai mơng Ping gah mơnuih ƀon sang hơkrŭ dêh čar Lao, mơnuih ƀon sang dêh čar Lao hơmâo ngă lu tơlơi prong hloh.

Khua dêh čar ơi Phạm Minh Chính pơhiăp telephôn hăng Khua dêh čar Lao.

Amăng mông pơhiăp hăng Khua dêh čar Kur ơi Hun Sen, Khua dêh čar ơi Phạm Minh Chính đăo gơnang, yŭ tơlơi git gai rơgơi mơng Khua dêh čar Hun Sen, dêh čar Kur amra pơđĭ kyar pơdrong asah hloh, pơphun truh kih mông jơnum amăng dêh čar, jơnum hăng čar rơngiao yôm amăng thun 2022, amăng anun hơmâo bruă ruah khua Khul pơ ala mơnuih ƀon sang să/phường hăng gơgrong klă bruă ngă Khua ASEAN 2022.

Siu H’Mai: Pơblang