Lơ 26/6, ƀơi sang jơnum prong, plơi prong jưh jom Bắc Kinh, dêh čar Khač, amăng hơdôm hrơi hyu mă bruă ƀơi dêh čar Khač, jơnum tơđar thun hăng khua mua kơsung nao tal 15 Jơnum bơwih ƀong huă rŏng lŏn tơnah či Đại Liên, Khua dêh čar ơi Phạm Minh Chính hơmâo mông bưp Khua mir sir dêh čar Khač, ơi Tập Cận Bình.

Ƀơi mông bưp, dua čô khua tŭ ư hrŏm ngă tum teč hloh hơdôm tơlơi pơsit mơ̆ng khua mua pơprong, biă mă ñu Tơlơi pôr hrŏm Việt Nam-Khač kơ bruă ngă kjăp hloh, pơđĭ tui bruă ngă giăng mah rô nao rai hlom bom, djop tơhnal man pơdong djop ring bruă pơprong, ba glăi anŏ gru hiam tŭ yua hơđong kjăp. Dua bơnah ăt pơčrong sai kơ hơdôm tơlơi ƀơi jar kmar, amăng kual dơ̆ dua bơnah đing nao, tŭ ư hrŏm wai lăng hăng pơsir djơ̆ lăp hơdôm tơlơi aka ƀu tŭ ư nao rai, pơgang pioh tơlơi rơnuk rơnua, hơđong ƀơi kual ia rơsĭ.