VOV4.Jarai-Ƀơi mông bưp khua git gai khul khua mua sang gum hơbit djop dêh čar, ơi Abduhlla Shahid, pơ anom bruă ƀơi New York, dêh čar Mi, ơi Phạm Minh Chính Khua dêh čar ta lăng yôm tơlơi djru ba mơ̆ng khua mua djop dêh čar tal 76 amăng bruă pơđĭ kyar hơđong kjăp, rŭ glăi tơlơi bơwih ƀong huă tơdơi kơ abih klin kheng, bong glăi anŏ pơblih ayuh hyiăng lŏn tơnah, pơblih bruă mă amăng sang bruă gum hơbit djop dêh čar.

Ơi Phạm Minh Chính Khua dêh čar ta lăi pơtong, sa boh dêh čar treng hang ia rơsĭ, Việt Nam lăng yôm biă mă kơtưn pơgang tơlơi rơnuk rơnua ƀơi ia rơsĭ, amăng anun djă pioh, mă yua, pơgang ba kông ngăn amăng ia rơsĭ hơđong, pơgang ayuh hyiăng anih hơdip jum dar kiăng rơnuk rơnua, hơđong laih anun ngă tui djơ̆ tơlơi phiăn jar kmar, boh nik hră pơkôl hrom Tơlơi phiăn ia rơsĭ thun 1982 juăt iâu UNCLOSE; čang rơmang khua git gai khul khua mua sang gum hơbit djop dêh čar djru lăng ba, pơtrut tơlơi anai ngă tui djơ̆ găl, yua anai lĕ bruă mă hrom abih bang, lăp hăng anŏ kiăng mơ̆ng lu dêh čar ngă ding kơna sang gum hơbit djop dêh čar.

Lăi nao kơ tơlơi ƀơi jar kmar dua bơnah đing nao, wơ̆t bruă amăng kual, dua bơnah lăi pơtong hrom kiăng kơtưn bruă ngă hrom hăng lu bơnah hăng ngă hrom jar kmar bong glăi tơlơi lông lăng ƀơi rŏng lŏn tơnah, biă mă ñu klin kheng duăm ruă hăng bruă ngă hrom bong glăi anŏ pơblih ayuh hyiăng.

Nay Jek: Pơblang