Amăng hrơi blan rơgao, sang anih jưh lêng kơ đing nao djru brơi mơnuih ƀôn sang Việt Nam, djru brơi mơnuih ƀôn sang hơđong pran jua dŏ hơdip, bơwih ƀong, pơgôp pơđĭ kyar bơwih ƀong huă mơnuih mơnam ƀơi dêh čar Lao hăng pơgôp brơi kơ plơi pla, lŏn ia, brơi tơlơi rô nao rai Việt Nam-Lao. Đĭ pơhiăp amăng mông bưp, Khua dêh čar ơi Phạm Minh Chính pơpŭ bơni hơdôm anom bruă pơ ala dêh čar ƀơi Lao hơmâo găn rơgao tơnap tap, pơgiong klă bruă mơ̆ Ping gah hăng kơnuk kơna jao, pơgôp pơtrut tơlơi rô nao rai giang mah hing ang, tơlơi gum pơgôp yôm phăn hăng ngă hrŏm djop mơta kơplah wah Việt Nam-Lao.

Khua dêh čar lăi rơđah, tơlơi rô nao rai Việt Nam-Lao, tơlơi rô nao rai bruă kơđi čar lĕ akŏ phun, laih dong kiăng pơtrut kơtang ngă hrŏm bơwih ƀong huă, ngă hrŏm pơtô pơjuăt, pơtô mơnuih mă bruă hăng hơdôm bruă pơkŏn dong, ba glăi tơlơi dưi sit nik brơi mơnuih ƀôn sang dua bơnah.