VOV4.Jarai - Mơmŏt lơ 28/6, ƀơi Hà Nội, Khua dêh čar ơi Phạm Minh Chính mut hrŏm mông bưp Jơlan hơdră amăng gong pơdah lăng nao rai mơng ataih “čang rơmang kual ia rơsĭ mơtah” ƀrô hrơi “Kual ia rơsĭ jar kmar” mơng Sang gum hơbit djop dêh čar, amăng rơwang hrơi tơjuh kual ia rơsĭ ƀơi Việt Nam.

Khua dêh čar ơi Phạm Minh Chính đĭ pơhiăp amăng Jơlan hơdră

Khua dêh čar ơi Phạm Minh Chính lăi pơtong, anai lĕ sa boh dêh čar kual ia rơsĭ glăk bơbeč nao kơtang yua ayuh hyiăng pơplih hăng yua ia rơsĭ ram đĭ, Việt Nam glăk pơdah pran gir run kơtang, gum hrŏm hăng jar kmar anăp nao pơjing kual ia rơsĭ mơtah, lŏn tơnah mơtah, rơnuk rơnua, hơđong hăng pơđĭ kyar pơdrông asah, gir run mă bruă, luă gŭ tơdruă hăng ngă tui tơlơi phiăn jar kmar; gir mut hrŏm hơdôm hơdră bruă dua bơnah hăng djop bơnah; gir pơtrut hơdôm bruă ngă hrŏm amăng kual, jar kmar kơ bruă amăng kual ia rơsĭ. Ƀrô tal anai, Khua dêh čar čang rơmang tŏ tui hơmâo tơlơi gum hrŏm, djru brơi tŭ yua kơ bruă amăng kual ia rơsĭ mơng djop khul grup jar kmar, hăng hơdôm dêh čar pơdrông asah.

Siu Đoan: Pơblang