VOV4.Jarai-Ƀrô tal nao  jơnum hrom khua mua pơprong kual ASEAN hăng Mi, čuă hăng mă bruă ƀơi dêh čar Mi hăng Sang gum hơbit djop dêh čar, ƀơi plơi prong jưh jom Washington D.C, Khua dêh čar ơi Phạm Minh Chính nao čuă hăng đĭ pơhiăp ƀơi anom kơsem min bruă mă dêh čar Mi. Amăng tơlơi đĭ pơhiăp mơ̆ng khua dêh čar hơmâo lăi pơtong, tơlơi tơpă, pran jua đăo kơnang hăng tơlơi glăm ba yôm biă mă pioh pơsir hơdôm tơlơi hlăk hơmâo ră anai ƀơi rŏng lŏn tơnah.

Khua dêh čar lăi, sa amăng hơdôm ding kơna hur har, hơmâo tơlơi glăm ba amăng kual ASEAN laih anun jar kmar, Việt Nam ăt gir run pơgôp pran jua amăng bruă bưp nao rai hăng ngă hrom, amra djru mơtam tơlơi gơgrong ba djơ̆ hăng tơlơi gêh găl mơ̆ng pô. Việt Nam čang rơmang kơtưn ngă hrom giăng mah hăng dêh čar Mi hăng tơlơi tơpă, ăt ngă kjăp tui tơlơi đăo kơnang, tơlơi glăm ba mơ̆ng abih dua bơnah, yua boh tŭ yua hrom mơ̆ng mơnuih ƀôn sang dua bơnah, yua tơlơi rơnuk rơnua, ngă hrom laih anun pơđĭ kyar amăng kual laih anun rŏng lŏn tơnah.

Nay Jek: Pơblang