VOV4.Jarai-Tlma mơmŏt lơ 21/2, Khua dêh čar ơi Phạm Minh Chính nao jơnum hrom hăng đĭ pơhiăp ƀơi mông jơnum Hơdră hơdor glăi Hrơi pioh kơ ƀing ơi ia jrao Việt Nam lơ 27/2 hăng akŏ jơnum “Ling tơhan ao kô̆”. Khua dêh čar ơi Phạm Minh Chính pơ ala kơ Ping gah, kơnuk kơna mơ-it hiăp bơni hơ-ơč lu biă mă kơ ƀing ơi ia jrao, nai ia jrao amăng dêh čar, ƀing hlăk dŏ mă bruă kah hăng čih pioh hơdôm bơnah ră ruai djă pioh yôm pơphăn gah bruă ia jrao; boh nik ñu lơ̆m djuai ania ta hlăk gir run găn rơgao hĭ tơlơi tơnap tap, gum pơgôp nao rai pơkơdong glăi hăng klin Covid 19.

Khua dêh čar ơi Phạm Minh Chính đĭ pơhiăp amăng mông Jơnum

Khua dêh čar lăi pơtong, Khua mua kơnuk kơna, djop sang bruă ping gah hăng gong gai kơnuk kơna djop gưl, hrom hăng abih bang mơnuih ƀôn sang lăng yôm bơni biă mă, thâo tong ten mơ̆n tơlơi tơnap tap mơ̆ng ƀing ngă bruă gah ia jrao, tơlơi tuh rơyuh pran jua, ai hơtai mă bruă pơjrao mơnuih duăm ruă.

Khua dêh čar ta rơkâo djop gưl anom bruă, djop tơring čar laih anun iâu pơthưr mơnuih ƀôn sang amăng dêh čar ăt pơtum sa pran jua kơ bruă brơi tlâ̆o pơgang djop, amăng anun tlâ̆o vaccine kơ čơđai kiăng dưi suaih pral pơgang kơ ană amôn găng añrăng laih anun djru dưi pơwơ̆t glăi hrăm hră hơđong.

Nay Jek: Pơblang