VOV4.Jarai-Tlam lơ 15/7, Khua dêh čar ơi Phạm Minh Chính nao čuh ñang h’ŭ ƀơi pra yang hơdor kơ Wa Hồ laih anun čuh ñang h’ŭ kơ ƀing tơhan khin hơtai djai pơsăn drơi jăn kơ lŏn ia să Hiệp Hưng, tơring glông Phụng Hiệp, tơring čar Hậu Giang. Tơdơi kơ anun, Khua dêh čar hăng grup hyu mă bruă nao ĕp lăng anih pơgang glai klô amăng kual ia dăo Lung Ngọc Hoàng gah tơring glông Phụng Hiệp. Anih pơgang glai klô Lung Ngọc Hoàng jing anih wai pơgang pioh lu djuai mơnong hơdip phara biă mă amăng dêh čar ta ră anai, anih arăng pơ anăn “Hla kơsô̆ mơtah” mơ̆ng kual lŏn mơnai ia krông Cửu Long, 9 hnoh ia krông amăng kual.

Khua dêh čar nao ĕp lăng anih pơgang glai klô ter ia krông Lung Ngọc Hoàng

Tơdơi kơ hmư̆ lăi pơthâo hăng ĕp lăng ƀơi anăp mơta, Khua dêh čar rơkâo tơring čar ĕp ƀing tuh pơ alin dưi ngă, thâo thăi găn rơgao laih kiăng pơđĭ tui, mă yua lŏn glai hnong hnăi amăng anih hlăk dŏ wai pơgang anai pioh ngă bruă ba tuai hyu ngui lăng glai klô ia krông tui hăng tơlơi phiăn dêh čar pơkă. Gong gai kơnuk kơna djop gưl ngă tui bruă jak iâu mơnuih ƀôn sang ngă hrom čơkă tuai rah, pơgang glai klô amăng ter hang ia krông laih anun pơgang tong ten djop djuai hlô mơnong him yôm  amăng glai.

Nay Jek: Pơblang