Amăng mông jơnum, Khua dêh čar ta lăi rơđah, bruă ngă Hơkrŭ măi mok tal 4 pơphun kơtang biă, biă ñu lĕ tơlơi pơđoh apui, pran jua gơgrong, anăn mă yua rak pioh rup, hră pơ-ar. Internet djop mơta... jing bruă glăk pơđĭ kyar tañ biă, djru kơ tơlơi pơđĭ kyar hrŏm mơ̆ng rim dêh čar, amăng anun hmâo Việt Nam.

Amăng dêh čar, Khua dêh čar ta brơi thâo glăk pok pơhai hơdôm jơlan hơdră, kơčăo bruă, amăng anun hmâo Tơlơi pơtrun pơsit 57 mơ̆ng Ding jum kơđi čar kơ pơplih pơđĭ kyar bôh thâo phrâo, hơdră phrâo măi mok, pơplih phrâo pơčeh phrâo hăng pơplih mrô lŏn ia, hơdôm Tơlơi pơtrun pơsit mơ̆ng Khua pơ ala mơnuih ƀôn sang, Gong gai dêh čar ... pioh pơtrut bôh thâo phrâo hơdră mă yua măi mok, pơplih phrâo pơčeh phrâo, pơplih mrô, pơtrut kơsem min, ngă rai gơnam tam, pơčeh pơkra, pơtô juăt mơnuih mă bruă, pơpha ngăn drăp, pơđĭ kyar anom mă yua, pơdŏng pơjing hơdră pơkă pioh pơtrut pơđĭ kyar. Khua dêh čar rơkâo khom pơjing rai tơlơi pơplih phrâo amăng bruă mă yua măi mok pơđoh apui. Tơhnal pơkă pơđĭ kyar thun anai lĕ 8,3-8,5% lĕ gơnong bruă măi mok pơđoh apui Việt Nam khom đĭ kyar, hmâo tơhnal ba jơlan, pơjing sa kual mă yua kơ gơnong bruă./.