Tui hră lăi pơthâo, amăng 6 blan akŏ thun, bruă pơplih ngă hră pơ-ar tŏ tui pơplih phrâo. Amăng anun đing nao pơsir hĭ tơnap tap, gun găn bơdjơ̆ nao bruă pơplih ngă hră pơ-ar, sit biă ñu hơdôm pok hră pơ-ar. Djop ding jum, ƀon lan ăt gir run ngă tui bruă jao. Tui jŭ yap sit nik, akŏ bruă pơplih ngă hră pơ-ar mơng djop ding jum, anom bruă bơkơnar ding jum hơmâo ba tơbiă 845 bruă jao, Jơnum min mơnuih ƀon sang hơdôm boh tơring čar, ƀôn prong hơmâo ba tơbiă 3.003 bruă jao.

Djop ding jum, gơnong bruă hơmâo pơgiong 296 bruă jao; Jơnum min mơnuih ƀon sang hơdôm boh tơring čar, ƀôn prong hơmâo pơgiong 1.384 bruă jao. Khua dêh čar rơkâo, abih bang ding kơna amăng khul git gai đing nao sem lăng, ngă rơđah hơdôm boh than dưi ngă, hơdôm anŏ aka ƀu klă amăng ngă hră pơ-ar lăi hrŏm, amăng anun đing nao ngă rơđah hăng ba tơbiă hơdră pơsir hĭ, pơsir hĭ hơdôm tơlơi gun amăng pơphun pok pơhai ngă tui.