VOV4.Jarai - Mơguah lơ 12/9, Khua dêh čar ơi Phạm Minh Chính git gai Jơnum kơ bruă pơhlôm hŭi apui ƀong sang hăng lăng glăi 5 thun ngă tui tơlơi pơtrun mrô 83 mơng Kơnuk kơna kơ bruă djru mơnuih mơng tơhan prah apui. Jơnum hơmâo pơphun lăng nao rai mơng ataih kơplah wah hơdôm Anom bruă kơnuk kơna ƀơi 63 boh tơring čar, ƀôn prong amăng đơ đam dêh čar.

Khua dêh čar ơi Phạm Minh Chính git gai mông jơnum

Đĭ pơhiăp amăng mông jơnum, Khua dêh čar ơi Phạm Minh Chính lăi pơtŏng, amăng hrơi blan laih rơgao, ƀuh na nao apui ƀong sang, ngă glêh tơnap, hăng jai hrơi jai lu tui. Khua dêh čar lăi pơtong, hơdôm bruă sat răm, ngă djai mơnuih kiăng rang kơđiăng dong, khŏm ba tơbiă hơdôm hơdră bruă pơhlôm phrâo, mơng anun amra plai ƀiă ngă răm rai, djai mơnuih. Hăng hơdôm wŏt ƀuh apui ƀong sang giăm anai, Khua dêh čar rơkâo Ding jum kông ang git gai pel ĕp, ngă rơđah tơlơi glăm ba mơng hơdôm anom bruă, gong gai ƀon lan hăng ƀing mơnuih bơdjơ̆ nao, kiăng kơ pơsir brơi khut khăt hloh.

Siu Đoan: Pơblang