VOV4.Jarai - Mơguah lơ 26/7, ƀơi sang bruă Kơnuk kơna, Khua dêh čar ơi Phạm Minh Chính git gai mông Jơnum kơnuk kơna kơ bruă čih pơkra tơlơi phiăn blan 7/2022 sem lăng 4 kơčăo bruă tơlơi phiăn, 1 tơlơi rơkâo čih pơkra tơlơi phiăn hăng 1 tơlơi pơsit mơng Kơnuk kơna. Pơhiăp hlâo ƀơi mông jơnum, Khua dêh čar ơi Phạm Minh Chính lăi rơđah, bruă ngă giong tơlơi phiăn jing 1 amăng 3 tơlơi yôm phun. Khua dêh čar ta kiăng lăng glăi mơng tơlơi hơmâo sit nik đah mơng pơhrua tui, ngă pơgiong, bơwih brơi bruă git gai, wai lăng klă hloh. Hơdôm ding jum, anom bruă pơđĭ tui mơnuih mă bruă anai yua dah ƀơi lu anih ăt aka ƀu lăp đing nao đơi. Khua dêh čar jao kơ Ding jum tơlơi phiăn pơtô brơi kiăng hơmâo lu mơnuih čih pơkra hră pơ-ar bơdjơ̆ nao tơlơi phiăn; Ding jum prăk kăk kiăng lăng nao kơ bruă anai. Mông jơnum anai pơƀut sem lăng 4 kơčăo bruă tơlơi phiăn, hơmâo Tơlơi phiăn pơgang hlâo kơđi dân sự, Tơlơi phiăn pơgăn bruă rao prăk (pơplih pơkra), Tơlơi phiăn pơgang ba tơlơi dưi mơnuih blơi gơnam (pơplih pơkra), Tơlơi phiăn pơmut tơbiă prăk tui điện tử, jing hơdôm tơlơi phiăn kiăng biă ră anai đah mơng wai lăng kơnuk kơna kơjăp hloh, klă hloh, ngă amuñ brơi hloh kơ mơnuih ƀon sang ngă tui tơlơi phiăn.

Siu H’Mai: Pơblang