Tui hăng jơlan hơdră jơnum tal anai, Kơnuk kơna sem lăng, pơgôp hiăp kơ 4 tơlơi kiăng čih pơkra tơlơi phiăn: Kiăng čih pơkra Tơlơi phiăn Mơnuih ngă nai; Tơlơi phiăn Djă pioh hră pơ-ar (pơplih pơkra); Kiăng čih pơkra Tơlơi phiăn pơkra glăi pơhrua tui hơdôm tơlơi mơ̆ng Tơlơi phiăn Hoá chất; Kơ bruă čih pơkra Tơlơi phiăn pơkra glăi, pơhrua tui hơdôm tơlơi phiăn bơdjơ̆ nao tuh pơ alin, prăk kăk kơnuk kơna brơi đah mơ̆ng pơsir hĭ hơdôm tơlơi tơnap mơ̆ng bruă tuh pơ alin kơnuk kơna gơgrong ngă. Pơhiăp ƀơi mông jơnum, Khua dêh čar ta brơi thâo, ngă 1 amăng 3 tơlơi pơplih phrâo prong, mơ̆ng thun 2022 truh ră anai, Kơnuk kơna hơmâo ngă rim blan, lêng kơ hơmâo sa wơ̆t jơnum čih pơkra tơlơi phiăn.

Amăng anun pơƀut pơsir hĭ tơlơi tơnap, tơlơi ngă gun bơdjơ̆ nao tơlơi phiăn, lăi nao tơlơi gơgrong bruă mơ̆ng pô ngă khua laih anun pơƀut čih pơkra tơlơi phiăn. Jơnum lok 6, khua pơ ala mơnuih ƀôn sang dêh čar tal 15 amăng blan 10 pơ anăp, amăng anun hơmâo lu tơlơi pơkôl pơkă, tơlơi phiăn tơnap, hơmâo lu tơlơi pơmin phara aka ƀu djơ̆ hrŏm. Yua hnun, Khua dêh čar kiăng pơƀut mơnuih mă bruă prăp lui klă, pơhlôm djơ̆ hrơi pơkă, anŏ klă čih tơlơi phiăn; hơdôm tơlơi phiăn, pơsir hĭ hơdôm tơlơi gun; ba tơbiă tơlơi gêh gal phrâo ngă amuñ brơi bruă pơđĭ kyar.