VOV4.Jarai - Mơguah lơ 24/8, ƀơi sang bruă Kơnuk kơna, Khua dêh čar ơi Phạm Minh Chính git gai jơnum Kơnuk kơna kơ bruă čih pơkra tơlơi phiăn blan 8/2022 sem lăng 4 kơčăo bruă tơlơi phiăn yôm hlâo či pơdah thâo, bơwih brơi amăng Jơnum lok 4 Khua git gai pơ ala mơnuih ƀon sang dêh čar tal 15 anun lĕ: Tơlơi phiăn Lŏn tơnah (pơkra glăi) yua Ding jim Kông ngăn lŏn tơnah hăng Ayuh hyiăng prăp lui; Tơlơi phiăn pơjuă nua tuh pơ plai bơwih ƀong (pơplih pơkra) yua Ding jum dưm dăp Akŏ bruă hăng Tuh pơ plai prăp rơmet; Tơlơi phiăn Ngă ƀong hrŏm (pơplih pơkra) yua Ding jum dưm dăp akŏ bruă hăng tuh pơ plai prăp rơmet; Tơlơi phiăn pơkă Nua (pơplih pơkra) yua Ding jum bruă prăk prăp.

Khua dêh čar Phạm Minh Chính git gai mông jơnum

Pơhiăp ƀơi mông jơnum, Khua dêh čar ơi Phạm Minh Chính lăi, bruă čih pơkra tơlơi phiăn yôm biă mă, kiăng ngă na nao, yua hnun kiăng abih bang khua amăng Kơnuk kơna, Khua hơdôm anom bruă khŏm ngă klă, pơƀut pran jua, tơlơi rơgơi bơkơtuai tŏng ten. Khua dêh čar čang rơmang ƀing khua pơƀut pơgôp hiăp kơ hơdôm bruă aka ƀu djơ̆ hrŏm, hơdôm tơlơi hơmâo phrâo, tơlơi dŏ gun.

Siu H’Mai: Pơblang