Mơguah tom brơi, lơ 20/4, Jơnum pôr pơthâo hăng pok pơhai rơnoh pơkă hnong đơ đam dêh čar mơ̆ng thun 2021-2030, lăng nao pơ thun 2050 tơdơi anai, hăng akŏ ñu “Tơlơi pơmin phrâo-lăng nao phrâo-anŏ gêh găl phrâo-rơnoh yôm phrâo” hơmâo pơphun gah yŭ tơlơi git gai mơ̆ng Khua dêh čar ơi Phạm Minh Chính. Jơnum anai dưi pơphun tui hơdră lăng nao rai amăng tivi anih pơdah rup phun mơ̆ng Anom bruă kơnuk kơna hăng 63 boh tơring čar, ƀôn prong amăng dêh čar.

Pơhiăp amăng mông jơnum, Khua dêh čar ơi Phạm Minh Chính lăi pơtong, pơkă hnong abih bang đơ đam dêh čar lĕ bruă mă kơđi čar yôm biă mă, sa bruă mă phun yôm sui thun samơ̆ ăt sa bruă mă prong, phrâo biă mă, tơnap tap, bơbeč djơ̆ lu mơta aka ƀu hơmâo tơlơi phiăn pơkă sit nik ôh. Anai yơh tơhnal pơkă pioh tơlơi phiăn pơsit djru Kơnuk kơna pơkă lăng, pơjing pran kơtang, anih pơđĭ kyar, dưi pơtruh nao rai hơdră pơkă hnong dêh čar hăng djop kual laih anun hnong pơkă amăng tơring čar, kiăng mă yua tong ten tơlơi gêh găl mơ̆ng lŏn mơnai glai klô kông ngăn dêh čar, pioh pơtrut pơđĭ kyar bơwih ƀong huă hmar hăng hơđong kjăp. Khua dêh čar pơtrun hiăp, djop gưl anom bruă pơtum nao git gai ngă tui sa hnong, tŭ yua 10 mơta bruă mă hơdră pơsir, pơpha bruă mă đing nao hlâo brơi mă yua prăk kăk hlăk dŏ hơmâo amăng hơdră anai.