VOV4.Jarai - Mơguah lơ 5/4, ƀơi sang bruă Kơnuk kơna, Khua dêh čar Phạm Minh Chính git gai Jơnum lăng mơng ataih kơ tơlơi bơwih ƀong huă - mơnuih mơnam blan 3 hăng 3 blan thun 2022, pok pơhai hơdră rŭ glăi hăng pơđĭ kyar bơwih ƀong huă, hơdră pơtrut tañ bruă kah pơpha, mă yua prăk tuh pơ plai bruă čar thun 2022, pok pơhai ngă ring bruă pơkra jơlan yôm amăng dêh čar. Pơhiăp ƀơi mông jơnum, Khua dêh čar ơi Phạm Minh Chính lăi, lơ 5/1, Kơnuk kơna pơphun Jơnum lăng mơng ataih amăng tivi hăng hơdôm boh tơring čar ƀon prong kơ tơlơi bơwih ƀong huă - mơnuih mơnam thun 2022, truh ră anai, krep 3 blan laih tơdơi kơ mông jơnum anai, kiăng pơtŏng glăi bruă mă thun 2022, tơlơi gum ngă mơng mơnuih ƀon sang, anom bơwih ƀong yŭ tơlơi git gai mơng gong gai kơnuk kơna.

Mông jơnum lăng amăng tivi đơ đam dêh čar ta

Khua dêh čar kiăng hơdôm anom bruă Ping gah kơnuk kơna khŏm pơhlôm hơmâo hơdră pơsir tañ, plai ƀiă hơmâo tơlơi truh sat, gơñăm nao tuč rơnuč lĕ pơhlôm tơlơi bơwih ƀong hơđong, jing dêh čar dưi wai lăng mă pô bruă bơwih ƀong. Khua dêh čar ta kiăng ƀing khua pơƀut pơmin, lăng glăi hơdôm tơlơi hơmâo ngă, djă pioh, kơđiăng lui, ba tơbiă hơdră pơsir mơng anai truh abih thun pioh ngă tui hơdôm Tơlơi pơtrun mơng Khua mua git gai pơ ala mơnuih ƀon sang, Kơnuk kơna, ngă dưi tơlơi Klah čun mơng Jơnum Ping gah tal 4 blan 10/2021.

Siu H’Mai: Pơblang