VOV4.Jarai - Mơguah lơ 5/7, Khua dêh čar ơi Phạm Minh Chính git gai jơnum tal 15, Khul khua git gai bruă pơhlôm pơgang klin Covid-19. Pơhiăp ƀơi mông jơnum, Khua dêh čar ơi Phạm Minh Chính kiăng ƀing khua pơƀut bơkơtuai, pơtŏng glăi klin kheng ƀơi rŏng lŏn tơnah, amăng kual hăng amăng dêh čar, hơdôm tơlơi pơplih phrâo, tơlơi tơnap, hơdôm tơlơi dưi ngă, aka ƀu dưi ngă, pơblang rơđah tơhnal gal, ba pơƀuh tơlơi gơñăm nao, tơlơi pơmin, tơlơi git gai, hơdră ngă bruă đah mơng dưi pơgang klin Covid-19 amăng hrơi blan pơ anăp. Ră anai, amăng dêh čar ta, hơmâo mơn anih đa ngă amưng, ƀu hŭi dong tah yua klin hơmâo pơgang baih, biă ñu bruă tlâ̆o vaccine dŏ kaih, aka ƀu djơ̆ hơnong pơkă, amăng anun hơmâo bruă tlâ̆o vaccine brơi čơđai mơng 5 truh 11 thun, hăng arăt 3 kơ mơnuih mơng 12 truh 17 thun, mah Kơnuk kơna, Khua dêh čar ta hơmâo git gai na nao yơh. Khua dêh čar ơi Phạm Minh Chính lăi, khut khăt ƀu dưi ngă amưng, pơ-ai ôh, khŏm hơmâo hơdră pơgang hlâo”. Amăng anun, sit biă ñu brơi ƀuh, vaccine ăt jing mơnong dưi pơgang phun. Bruă tlâ̆o vaccine jing tơlơi dưi, tơlơi gơgrong bruă khŏm ngă mơng rim čô mơnuih đah mơng pơgang ba pô ta, sang anŏ hăng mơnuih ieo gah.

Siu H’Mai: Pơblang