VOV4.Jarai-Mơguah lơ ¾, ƀơi sang bruă kơnuk kơna, Khua dêh čar ơi Phạm Minh Chính git gai jơnum kơ bruă mă ba apui lơtrik yua laih anun sĭ mơdrô hơdăng pơtâo, ayuh gaih kơ bruă pơkra apui lơtrik. Pơhiăp ƀơi mông jơnum, Khua dêh čar ơi Phạm Minh Chính lăi rơđah, apui lơtrik yua lĕ sa amăng 5 mơta bruă ngă bơkơnar prong biă mă, ta khom pơsir tañ hăng pơtrut pơđĭ kyar bơwih ƀong huă mơnuih mơnam hơđong kjăp. Thun blan rơgao, hrom hăng anŏ kiăng yua apui lơtrik jai hrơi lu tui hăng anŏ pơđĭ kyar bơwih ƀong huă mơnuih mơnam; tơdơi kơ pơblih hơdră mă bruă tui hluai gêh găl hơđong hăng klin Covid 19, rŭ glăi, pơđĭ kyar bơwih ƀong huă mơnuih mơnam anŏ kiăng yua apui lơtrik lu, biă mă ñu apui lơtrik amăng dêh čar đĭ tui.

Hrom hăng anun, tơlơi pơkra ming ba yua, sĭ mơdrô, nua apui lơtrik rŏng lŏn tơnah pơblih kơtang. Ƀơi mông jơnum, hơdôm kơ-iăng khua dêh čar, khua mua pơ ala djop ding jum, anom bruă gơnong dlông pơčrông sai lăi pơthâo, rơkâo đĭ ĕp hơdră pơsir, rŭ glăi tơlơi tơnap tap, lông lăng, kiăng hơdai gum hrom mơ̆ng djop sang bruă kơnuk kơna djru hrom pơtrut bơwih ƀong huă kơñ pơgi.

Pơhiăp klah čun ƀơi mông jơnum, Khua dêh čar ơi Phạm Minh Chính kiăng pok pơhai lu hơdră ngă bơkơnar anŏ kiăng gah apui lơtrik, bruă mă git gai wai lăng, kah pơpha pơkĕ yua apui lơtrik kiăng hơmâo boh tŭ yua. Tơhnal pơkă anăp nao lĕ bơkơnar djop apui lơtrik hăng gơnam yua hăng apui lơtrik brơi hơđong kjăp.

Nay Jek: Pơblang