Khua dêh čar ta lăi rơđah, pơmut hrom hmâo jing laih pran pơtrut yôm phăn pơđĭ dlông pran gơgrong, djru pơđĭ kyar lŏn ia. Abih tih prăk pơhrui glăi mơ̆ng gơnam sĭ kơ dêh čar tač rơngiao 7 blan thun anai hmâo rơbêh kơ 514 klai dolar Mi; prăk tuh pơplai ƀơi anăp mơ̆ng dêh čar tač rơngiao (FDI) ngă hră hăng ngă tui hmâo 24 klai dolar Mi, ngă brơi Việt Nam mut amăng ƀut 15 bôh dêh čar glăk đĭ kyar ngă pơhưč FDI dlông hloh rŏng lŏn tơnah.

Mut hrŏm ăt pơtrut ngă giong mơn hơdră pơkă amăng lŏn ia pơplih phrâo hơdôm tơlơi pơkôl jar kơmar, pơđĭ dlông anih gơgrong hăng bôh pơhiăp mơ̆ng Việt Nam ƀơi jar kơmar. Khua dêh čar rơkâo tañ čih pơkra Tơlơi pơtrun pơsit mơ̆ng Khua pơ ala mơnuih ƀôn sang kơ hơdră pơkă, hơdră bruă phara ha jăn măng mut hrŏm; đing nao pơtlaih anô̆ dol gah hơdră pơkă, hơdră bruă, pơjing jơlan phrâo pioh mut hrŏm jar kơmar sit nik pran pơtrut kơ pơđĭ kyar./.