Mơguah lơ 8/8, đĭ pơhiăp pơđut mông jơnum Khul git gai dêh čar kơ hơdôm ring bruă man pơkra phun dêh čar mơng gơnong bruă wai lăng jơlan glông. Khua dêh čar ơi Phạm Minh Chính rơkâo hơdôm anom bruă tuh pơ alin, anom bruă man pơkra gum hrŏm hăng djop ƀon lan kiăng pơsir hĭ tơnap tap, gun găn, pơplih pơkra hơdôm bruă aka ƀu klă ƀơi hơdôm ring bruă man pơkra jơlan glông ră anai. Djop ring bruă man pơkra jơlan rơdêh đuăi hmar glăk pok pơhai man pơkra giăm 1.700 km amăng đơ đam dêh čar, amăng anun hơmâo giăm 1.200 km him lăng amra pơgiong amăng thun 2025 kiăng dưi ngă tui mrô pơkra km jơlan rơdêh đuăi hmar đơ đam dêh čar glông rơbêh 3.000 km.

Khua dêh čar rơkâo, djop ding jum, gơnong bruă, gong gai ƀon lan, sit biă ñu hơdôm anom bruă tuh pơ alin, anom bruă man pơkra mut hrŏm, ngă ba glăi tŭ yua tơlơi pơplông “500 hrơi mlăm mă bruă kiăng pơgiong hơdôm ară jơlan rơdêh đuăi hmar” pioh čơkă Jơnum Ping gah djop gưl, anăp nao Jơnum Ping gah đơ đam dêh čar tal XIV, tal hơdor glăi 80 thun hrơi akŏ pơjing kơnuk kơna lŏn ia, 50 thun hrơi blah dưi ƀơi kual Dơnung pơklaih rơngai lŏn ia ta.