Ƀrô djơ̆ tal Noel thun 2024, Khua dêh čar ơi Phạm Minh Chính hmâo čuă, hơ-ưč hmưi Khul đăo khôp Lào Cai ƀrô djơ̆ tal Noel thun 2024. Pơ ala kơ khua git gai Ping gah, Kơnuk kơna, Khua dêh čar ta ơi Phạm Minh Chính mơ-ĭt tơlơi hơ-ưč hmưi hrơi Noel yâo mơ-ak, rơnuk rơnua truh hăng ƀing ama pơtô đăo, ƀing nai, ƀing kom drơi kơ yang hăng neh wa đăo khôp Lào Cai. Khua dêh čar ta pơtŏng sit, Ping gah, Kơnuk kơna čang rơmang Ama wai lăng, Ama pơtô đăo, ƀing nai pơtô, ƀing kom drơi kơ yang tô̆ tui dong pran jua “Pơpŭ kơ Khua yang khăp kơ lŏn ia”, “Hơdip klă đăo hiam”, đăo nao hrŏm hăng djuai ania, gum hơgôp klă amăng tơlơi pơđĭ kyar lŏn ia hăng ngă brơi tơlơi rô nao rai Việt Nam – Vatican jai hrơi jai klă hiam.

Khua dêh čar pơtŏng sit, Ping gah, Kơnuk kơna Việt Nam pơmin ha sa kơ hơdră bruă pơhlôm tơlơi dưi tui đăo, jơnum hơduah yang mơ̆ng mơnuih ƀôn sang, pơpŭ hăng ngă gal brơi pioh djop mơnuih ăt kah hăng hơdôm tơlơi đăo jơnum, gum hrŏm pơdŏng, pơgang lŏn ia. Khua dêh čar rơkâo gưl Ping gah, Gong gai hơdôm gưl tơring čar Lào Cai hăng hơdôm anih anom đơ đam dêh čar hrŏm hăng Grŭp wai lăng tơlơi đăo Gong gai dêh čar leng kơ lăng ba, pel ĕp hơdôm kual tơnap tap pioh hmao djru brơi mơnuih ƀôn sang; bơwih brơi, pơhlôm kơ mơnuih ƀôn sang dưi čơkă bơyan Noel rơnuk rơnua./.