Kơčăo bruă dang hrĕ apui lơtrik 500 kV arăt tal 3 anai dưi hơmâo group apui lơtrik Việt Nam jao kơ phun kông ty dăng hrĕ apui lơtrik dêh čar ngă pô tuh pơ alin, hơmâo rơnoh glông ataih 519 km, 1.177 anih man pơkra gong prong, dăng hrĕ apui lơtrik, 513 anih ngă gong dăng hruă jăng hrĕ ngă kơjăp, găn nao pơ 211 boh să, phường mơ̆ng 43 boh tơring glông amăng 09 boh tơring čar hăng rơnoh prăk tuh pơ alin abih tih 22.300 klai.

Pơhiăp ƀơi mông jơnum, Khua dêh čar pơčrâo rơđah, kơčăo bruă anai yom biă mă, pơđĭ tui kơnuih, anăn hmư̆ hing gah anom bruă apui lơtrik dêh čar ta pơ jar kmar; pơsit tong ten tơlơi mă bruă, khin hơtai, h’ĭn pran jua mơ̆ng anom bruă apui lơtrik. Khua dêh čar lăi, ping gah git gai, kơnuk kơna tŭ ư hrŏm, khua pơ ala mơnuih ƀôn sang dêh čar dong yua, Mơnuih ƀôn sang tŭ ư, kơnong pơčrong sai khom ngă, ƀu hơmâo kơdŭn glăi ôh. Bruă mă mơ̆ng thun 2024, Khua dêh čar lăi anom bruă apui lơtrik hơmâo ngă pơgiong hiam klă hloh, čang rơmang anom bruă apui lơtrik amăng thun 2025 kơ boh tơhnal kiăng pơđĭ tui dơ̆ng, hloh kơ thun 2024 laih anun ăt khom pơhlôm anăm lui kơƀah apui lơtrik yua.