VOV4.Jarai-Lơ 16/3, Khua dêh čar ơi Phạm Minh Chính mă bruă hăng anom bruă Group ia jâo ayuh Lŏn ia Việt Nam (PVN) kơ bruă mă amăng thun 2021, 2 blan akŏ thun 2022 hăng akŏ bruă thun 2022. Pơhiăp klah čun amăng mông jơnum, Khua dêh čar ơi Phạm Minh Chính lăi pơtong, Khua dêh čar kơnuk kơna hơdôm gưl lêng kơ gleng nao biă mă kơ PVN kiăng kơ Group anai pơđĭ kyar hơđong, mă bruă tơpă laih anun jai hrơi tŭ yua hloh. Khua dêh čar tŭ ư hăng tơlơi rơkâo,  bruă pơdah thâo mơ̆ng PVN ƀơi mông mă bruă. Amăng anun, hơmâo hơdôm tơlơi hơmâo pok pơhai hăng hlăk pok pơhai dưi pơsir.

Hăng hơdôm tơlơi rơkâo pơdjơ̆ nao anom bruă kơnuk kơna djru pơsir laih, PVN kiăng ngă hrom tong ten hăng hơdôm ding jum, anom bruă brơi pơsir khut khăt djơ̆ tơlơi pơtrun. Khua dêh čar rơkâo kơ Khua mua PVN pơtrut pran jua ƀing khua mua apăn bruă, mơnuih mă bruă amăng anom bruă thâo gum pơgôp, tŭ ư hrom, gir run hloh kiăng găn rơgao tơlơi tơnap tap, lông lăng, hrom hăng Ping gah, kơnuk kơna laih anun mơnuih ƀôn sang ngă pơgiong bruă jao, pơhlôm djop ia jâo, apui lơtrik yua ră anai hăng pơ anăp adih, djru pơgôp man pơdong atur bơwih ƀong huă rơngai, ngă pô.

Nay Jek: Pơblang