VOV4.Jarai-Mơguah lơ 16/8, Khua dêh čar ơi Phạm Minh Chính hăng grup hyu mă bruă mơ̆ng Kơnuk kơna nao sem lăng bruă hăng mă bruă tom Group tuh tia pơkra  ming dăng kông ling tơhan Viettel. Viettel lĕ anom bruă mrô sa gah bruă dăng kông Việt Nam laih anun anom bruă bơwih ƀong sĭ mơdrô prong tal 4 ƀơi dêh čar, prăk pơhrui glăi amăng đơ đam bruă sa thun 150 rơbâo klai prăk; prăk kơmlai duh jia giăm 40 rơbâo klai prăk sa thun.

Amăng mông jơnum mă bruă

Pơ ala khua mua ping gah, kơnuk kơna, lŏn ia, Khua dêh čar čih pioh hăng bơni biă mă boh tơhnal mơ̆ng ƀing khua mua, khua tơhan, mơnuih mă bruă kơ Viettel gir run ngă bruă thun blan rơgao. Kiăng dưi giong bruă jao pơ anăp anai, Khua dêh čar rơkâo Ding jum ling tơhan git gai Group Viettel ngă klă hơdôm bruă phun, amăng anun lăi: Viettel amra jing hơbô̆ bruă phrâo gah bruă bơwih ƀong huă sĭ mơdrô mơ̆ng kơnuk kơna ngă pô ngă bruă hơmâo boh tŭ yua lu, jing group ngă bruă tuh tia pơkra ming hăng boh thâo ia rơgơi, mă bruă hmar, beč bal, dưi pơhno amăng dêh čar hăng tač rơngiao.

Nay Jek: Pơblang