VOV4.Jarai - Tlam lơ 10/7, Khua dêh čar ơi Phạm Minh Chính mă bruă hăng Khul apăn bruă Ping gah ƀôn prong Cần Thơ kơ bruă pok pơhai ngă tui tơlơi pơtrun mơng Ding jum kơđi čar amăng pơjing hăng pơđĭ kyar ƀôn prong Cần Thơ truh thun 2030, anăp nao truh thun 2045; tơlơi pơtrun mơng Khua pơ ala mơnuih ƀon sang dêh čar kơ bruă ngă lông lăng sa, dua hơdră bruă akŏ phun kiăng pơđĭ kyar ƀôn prong Cần Thơ.

Mông mă bruă

Đĭ pơhiăp amăng mông mă bruă, Khua dêh čar ơi Phạm Minh Chính lăi rơđah, mah dưi ngă lu bruă yôm phun, samơ̆ Cần Thơ ăt dŏ lu bruă ngă aka ƀu klă anun lĕ: Aka ƀu gir rin abih pran amăng bruă git gai, wai lăng yua anun aka ƀu hrưn đĭ kơtang, kiăng tuh pơ alin lăp djơ̆; pơđĭ kyar bơwih ƀong huă aka ƀu djơ̆ hăng tơlơi gal. Khua dêh čar rơkâo, Khua mua ƀôn prong kiăng git gai djop gơnong bruă, anom bruă, djop gưl gong gai tŏ tui sem lăng, ngă rơđah hơdôm bruă aka ƀu klă mơng anun ĕp hơdră pơkra amăng bruă git gai kiăng kơ klă ƀiă dong pơ anăp anai.

Siu Đoan: Pơblang