VOV4.Jarai-Tlam lơ 20/3, ăt amăng tal nao čuă, mă bruă ƀơi tơring čar Bình Phước, Khua dêh čar ơi Phạm Minh Chính hăng grup hyu mă bruă mơ̆ng Kơnuk kơna hơmâo mă bruă hăng Khua mua ping gah tơring čar Bình Phước kơ tơlơi pơhing pơđĭ kyar bơwih ƀong huă mơnuih mơna thun 2021, 2 blan akŏ thun 2022; anăp ngă bruă, hơdră pơtrut pơđĭ kyar bơwih ƀong huă mơnuih mơnam thun 2022 laih anun hơdôm thun tŏ tui.

Pơhiăp ƀơi mông mă bruă, lăi nao akŏ bruă pơ anăp adih, Khua dêh čar ơi Phạm Minh Chính pơtrun hiăp kơ khua mua jơnum min mơnuih ƀôn sang tơring čar Bình Phước gir run mơneč mă tơlơi gêh găl hrưn đĭ mơ̆ng tơlơi tơnap tap, pơmin tong ten ĕp djop jơlan hơdră pơhrŏ prăk yua, thâo pơkrem laih anun pơtum bruă tuh pơ alin pơđĭ kyar; khom pơtong glăi tong ten, anăm tuh pơ alin tŭ kơ hơmâo, pơgăn tơlơi soh sat ƀông kông ngăn, ƀong prăk la; pơtong rơđah bruă mă phun kiăng ngă tui tŭ yua hơdră “Dŏ hrom rơnuk rơnua, beč bal, pel ĕp klin kheng covid 19”, ngă tui klă Hơdră rŭ glăi bơwih ƀong huă hăng pơđĭ kyar mơnuih mơnam.

Ăt amăng mông jơnum mơ̆n, khua dêh čar lăi khom ngă tui djơ̆ tơlơi pơtrun mơ̆ng ping gah dêh čar ta tal XIII; pok pơhai tŭ yua tơhnal pơtrun Jơnum ping gah tơring čar tal XI hăng 3 bruă mă prong: čuk pơkra jơlan, pơblih hơdră ngă hră pơar hăng pơhrăm mơnuih mă bruă čar.

Nay Jek: Pơblang