VOV4.Jarai-Tlam lơ 22/3, ƀơi Sang bruă kơnuk kơna, Khua dêh čar ơi Phạm Minh Chính mă bruă hăng Khua mua Khul wai lăng mơnuih tha rơma Việt Nam. Lăi pơthâo ƀơi mông jơnum, Khua Khul mơnuih tha rơma Việt Nam, ơi Nguyễn Thanh Bình brơi thâo, Khul mơnuih tha rơma Việt Nam jai hrơi đĭ kyar, kjăp tui bruă mă, pơtum lu mơnuih tha rơma mut phung. Truh ră anai, Khul hơmâo 9 klăk 700 rơbâo čô ding kơna, ƀiă abih 90% mrô mơnuih tha rơma amăng dêh čar.

Pơhiăp klah čun amăng mông jơnum, Khua dêh čar ơi Phạm Minh Chính mơ-it hiăp pơpŭ kơ abih bang ding kơna mơnuih tha rơma amăng dêh čar hăng tơlơi pơpŭ hiam klă hloh, laih dơ̆ng lăi bruă mă anai tơlơi glăm ba mơ̆ng kơnuk kơna pioh kơ mơnuih tha rơma, pơsir hơdôm tơlơi dŏ kơƀah, jơlan hơdră tơlơi kiăng mơ̆ng mơnuih tha rơma. Khua dêh čar rơkâo lăng yôm hloh bruă mă pơtô pơblang, pơđĭ tui tơlơi thâo hluh kơ anŏ glăm ba, bruă mă, boh yôm bruă wai lăng, djru ba mơnuih tha rơma, hơdor tơngia kơ tơlơi pơgôp pran jua mơ̆ng ƀing tha rơma amăng lŏn ia. Pơđĭ tui boh tŭ yua git gai mơ̆ng kơnuk kơna hăng bruă mă Khul mơnuih tha rơma laih anun djru ba djơ̆ hơdră.

Nay Jek: Pơblang