VOV4.Jarai- Amăng tlam lơ 6/3, Khua dêh čar ơi Phạm Minh Chính hrŏm hăng khua mua hơdôm ding jum, gơnong bruă, mă bruă hăng Khua mua tơring čar Kiên Giang kiăng kơ lăng glăi bruă pơđĭ kyar bơwih ƀong huă mơnuih mơnam thun 2021, 2 blan akŏ thun 2022 hăng hơdôm thun pơ anăp dong. Amăng mông mă bruă, Khua git gai Ping gah tơring čar Kiên Giang Đỗ Thanh Bình brơi thâo, thun 2021, Kiên Giang ăt kah hăng lu tơring čar bơbeč nao kơtang mơng klin Covid-19, samơ̆ 3 kual bơwih ƀong phun ăt pơđĭ kyar  hơđong (mah aset) amăng thun blan dŏ lu tơnap tap. Rơnoh pơđĭ kyar bơwih ƀong huă đĭ, GRDP đĭ 0,58%. Pơhrui ngăn drăp kơnuk kơna rơbêh 11 rơbâo klai prăk. Đĭ pơhiăp amăng mông jơnum, KHua dêh čar ơi Phạm Minh Chính pơpŭ hăng lăng yôm hơdôm boh than mơ̆ tơring čar Kiên Giang dưi ngă  amăng thun blan laih rơgao, biă mă ñu amăng bruă pơgang klin, hrŏm hăng anun, Khua dêh čar ăt lăi nao hơdôm anŏ aka ƀu klă hăng hơdră pơđĭ kyar. Khua dêh čar rơkâo, tơring čar kiăng tŭ mă hơdôm anŏ gal, tơlơi dưi kiăng pơđĭ kyar, pơphun bruă khut khăt, lăng tơlơi lông jing tơlơi dưi, tơnap tap jing tơlơi pơtrut pơsur. Pơđĭ kyar kơtang bơwih ƀong amăng kual ia rơsĭ, pơplih bruă ngă hmua, đing nao pơđĭ kyar bruă tuh tia pơkra pơjing, ngă gêh gal kiăng pơđĭ kyar bơwih ƀong huă mơnuih mơnam.

Siu Đoan: Pơblang