Amăng 7 blan akŏ thun 2023, tơlơi bơwih ƀong huă-mơnuih mơnam amăng tơring čar Bắc Ninh hơmâo lu tơlơi dưi, bruă bơwih ƀong glăk hơkrŭ glăi, abih tih rơnoh sĭ mơdrô hăng bơwih bơwang giăm 54 rơbâo klai prăk, rơnoh prăk tuh pơ alin mơng tač rơngiao phrâo truh pơ 770 klăk đôlar Mi, đĭ giăm 4,6 wŏt pơhmu tui tơđar. Khua dêh čar ơi Phạm Minh Chính lăng yôm hơdôm tơlơi gir run hăng boh than dưi ngă mơng Ping gah, gong gai, ling tơhan hăng mơnuih ƀon sang tơring čar Bắc Ninh, pơgôp yôm phăn amăng tơlơi dưi hrŏm đơ đam dêh čar.

Pơ anăp anai Khua dêh čar rơkâo, tơring čar Bắc Ninh pơsur pơplih pơčeh phrâo, pơphun bruă mă, pơđĭ kyar  bơwih ƀong sĭ mơdrô. Pơtrut mă sĭ mơdrô pơ tač rơngiao; đing nao pơđĭ kyar ngă đang hmua yua boh thâo phrâo, pơplih tơlơi pơmĭn mơng ngă hmua tui hơđăp hơdai nao ngă hmua pơhrui lu ƀiă, pơđĭ kyar anih anom sĭ mơdrô gơnam đang hmua amăng lŏn ia hăng tač rơngiao. Tơring čar kiăng ngă tui pran kơtang mơng ngă hơkrŭ, gru grua, gum pơgôp, hrưn đĭ kơtang tui tơlơi dưi mă pô, ƀu dŏ tơnguăn hơget ôh, pơgôp pơjing tơlơi bơwih ƀong huă hơđong, gơgrong mă pô.