VOV4.Jarai-Amăng tal nao čuă hăng mă bruă ƀơi ƀôn prong Cần Thơ, Khua dêh čar ơi Phạm Minh Chính hăng grup hyu mă bruă mơ̆ng kơnuk kơna nao čuă hăng mă bruă hăng khua mua phun kông ty pơkĕ apui lơtrik 2, Group apui lơtrik Việt Nam. Tơdơi kơ hmư̆ lăi pơthâo tơlơi pơhing mă bruă sĭ mơdrô pơkĕ apui lơtrik, hnong mă bruă man pơdong lu kơčăo bruă, Khua dêh čar ơi Phạm Minh Chính rơkâo phun kông ty khom kơsem min lăng hơdră mă yua anŏ gêh găl dŏ hơmâo hăng tuh pơ alin ba yua boh thâo ia rơgơi phrâo, kiăng huăi čuh apui hơdăng kơñ pơgi anai.

Bruă anăp nao, kiăng kơsem min mă yua apui lơtrik dar hăng jua angin, pil pơ-iă yang hrơi. Kơ hơdôm kơčăo bruă Anom apui lơtrik Ô Môn, Khua dêh čar pơtrun hiăp kơ Ding jum Tuh tia pơkra ming hăng sĭ mơdrô, group apui lơtrik Việt Nam EVN, Group ia jâo Việt Nam PVN ngă hrom jŭ yap lăng rơnoh apui lơtrik pơkĕ yua, kiăng mă yua đut tơhnal sang măi Ô Môn I, II, III, IV.

Nay Jek: Pơblang