VOV4.Jarai-Tlam lơ 29/5, Khua dêh čar ơi Phạm Minh Chính hăng Grup khua mua ngă bruă mơ̆ng kơnuk kơna hơmâo mă bruă hăng khua mua ping gah tơring čar Sơn La kơ boh tơhnal pơđĭ kyar bơwih ƀong huă mơnuih mơnam, pơgang tơlơi rơnuk rơnua dêh čar, akŏ pơdong bruă kơđi čar thun 2021 hăng hơdôm blan akŏ thun 2022, anăp ngă bruă kơñ pơgi dŏng. Pơhiăp ƀơi mông jơnum, Khua dêh čar ơi Phạm Minh Chính bơni hăng lăng yôm boh tơhnal mơ̆ ping gah, gong gai kơnuk kơna hăng mơnuih ƀôn sang tơring čar Sơn La dưi ngă laih amăng bruă pơđĭ kyar bơwih ƀong huă mơnuih mơnam thun blan rơgao, djru hrom pơđĭ kyar amăng dêh čar ta.

Kơ tơlơi git gai pơ anăp, ơi Phạm Minh Chính Khua dêh čar pơtrun hiăp, ngă tui sa amăng plĕ, tŭ yua boh tơhnal Hră pơtrun jơnum ping gah dêh čar ta tal XIII, hră pơtrun mơ̆ng ping gah tơring čar, hơdôm hră pơtrun mơ̆ng gơnong dlông dêh čar, amăng anun hơmâo hră pơtrun brơi pơkă glăi lŏn hmua, lŏn đang, plơi pla, mơnuih ƀôn sang ngă hmua hăng anom ngă ƀong hrom, Hră pơtrun mơ̆ng Ding jum kơđi čar anăp pơđĭ kyar bơwih ƀong huă mơnuih mơnam, pơgang rơnuk rơnua dêh čar, rơnuk rơnua amăng kual treng čư̆ hăng kual gah kơdư dêh čar.

Nay Jek: Pơblang