Amăng mông jơnum, Ding jum wai lăng jơlan glông hơmâo lăi pơthâo kơ bruă pok pơhai man pơkra jơlan rơdêh đuăi hmar Cần Thơ-Cà Mau, ară jơlan mơng Hậu Giang-Cà Mau, hơdôm anom bruă lăi pơthâo kơ bruă man pơkra, anŏ gêh gal, tơnap tap, gun găn, pơjing akŏ bruă pơhlôm ngă pơgiong amăng thun 2025, gir run tañ ƀiă tui tơlơi pơkă. Đĭ pơhiăp amăng mông jơnum hăng khua mua hơdôm ding jum, gơnong bruă, ƀon lan, Khua dêh čar rơkâo đing nao pơčrông sai hơdôm bruă phun, amăng anun: lăng glăi bruă gưl Ping gah, gong gai ƀon lan hơmâo ngă bruă kơtang hă ƀŭ; lăng glăi bruă man pơkra, mă bruă djơ̆ hrơi mông pơkă hă ƀŭ; kơ čuah pơtâo; bruă jao čuah pơtâo dŏ gun găn hơpă mơn, hăng pơčrông man pơkra tŏ tui dong mơng Cà Mau nao truh rơnuč kual lŏn; hrŏm hăng anun pơčrông sai kơ bruă gum hrŏm kơplah wah hơdôm boh tơring čar amăng pơhlôm brơi geč pơsơi, čuah pơtâo…

Đĭ pơhiăp pơđut mông jơnum, Khua dêh čar ơi Phạm Minh Chính pơtong sit glăi kual lŏn dăo ia krông Cửu Long hơmâo 2 anih gun kơ bruă man pơkra jơlan hăng mơnuih ngă bruă. Ping gah, Kơnuk kơna đing nao biă mă kiăng pơsir hĭ. Tui tơlơi pơkă, truh thun 2030, kual lŏn dăo ia krông Cửu Long glông 1.200 km ară jơlan rơdêh đuăi hmar, kiăng gir run ngă tui hơnong pơkă anai.