VOV4.Jarai - Tlam lơ 26/1, Khua dêh čar ơi Phạm Minh Chính nao čuă jơmư, hơ-ơč hmưi tê̆t kơ ƀing khua, ling tơhan Puih kơđông pơgang guai Bah amăng jang Jar kmar Móng Cái. Pơ ala kơ Khua mua Ping gah, Kơnuk kơna, Khua dêh čar ơi Phạm Minh Chính mơ-it kơ abih bang khua mua, ling tơhan Puih kơđông tơhan pơgang guai Bah amăng jang Jar kmar Móng Cái, mơnuih mă bruă ƀơi Bah amăng jang tơlơi tơña bla, hơ-ơč hmưi hiam hloh. Khua dêh čar lăi, tơring čar Quảng Ninh jing anih yôm biă mă amăng tơlơi rơnuk rơnua, ling tơhan, jing anih ngă hrŏm jar kmar prong mơng lŏn ia ta. Yua anun, tơhan pơgang guai hơmâo bruă mă yôm biă, gum pơgang lŏn ia, ngă amuñ brơi kiăng pơđĭ kyar bơwih ƀong huă - mơnuih mơnam. Kơ bruă mă yôm phun amăng thun 2022, Khua dêh čar kiăng tơhan pơgang guai thâo rơđah bruă arăng jao lĕ pơgang kơjăp lŏn ia, hăng jơlan guai; djă bong tơlơi rơngai, hơđong kơjăp ƀơi guai dêh čar đah mơng pơtrut tui tơlơi jơnum pơbưp, rô nao rai hăng pơđĭ kyar; ƀu brơi bơdjơ̆ nao tơlơi hơđong kơjăp, ngă giăng mah, ngă hrŏm amăng bruă rô nao rai hăng dêh čar ieo gah. Ngă klă bruă pơtom hiăp wai lăng guai dêh čar; gum akŏ pơjing guai dêh čar rơngai, ngă hrŏm hăng pơđĭ kyar.

Siu H’Mai: Pơblang