VOV4.Jarai -Tlam lơ 1/7, amăng hơdôm hrơi nao mă bruă ƀơi Dak Lak, Khua dêh čar ta ơi Phạm Minh Chính hơmâo nao čuă, mă bruă, pơ alum pran jua ƀing tơhan ƀơi anom bruă git gai ling tơhan tơring čar Dak Lak hăng Kông ang tơring čar. Đĭ pơhiăp amăng mông mă bruă, Khua dêh čar rơkâo Anom bruă git gai ling tơhan tơring čar Dak Lak kiăng kơ hruă kjăp, ngă tui khut khăt tơlơi pơkă mơng Ping gah, kiăng git gai kjăp hloh, ƀơi anăp, djop mơta kơ bruă ling tơhan, ngă tui tơlơi git gai mơng Kơnuk kơna, hơdip mut hrŏm, jê̆ giăm hăng mơnuih ƀon sang.

Hrŏm hăng anun, kiăng kiăo tui lăng djop mơta bruă kiăng pơphô brơi Ping gah, Gong gai, anăm ngă amưng, kiăng hơdeč hmar pơsir hĭ hơdôm bruă amra ƀuh pơ anăp; kiăng rang kơđiăng hloh, wai pơgang kjăp tơlơi rơngai, ngă pô, hơđong amăng lŏn ia, tơlơi dưi kơ dêh čar, djop djuai ania, mah bruă hơget tơdah kiăng amra ngă pơgiong mơtăm mơ̆ Ping gah hăng Kơnuk kơna jao trun. Khua dêh čar rơkâo gưl Ping gah, gong gai djop gưl kiăng tŏ tui đing nao, ngă gêh gal brơi ling tơhan, kông ang mơnuih ƀon sang djop gưl ngă klă bruă jao.

Siu Đoan: Pơblang