Pơhiăp đĭ amăng mông jơnum, Khua dêh čar ơi Phạm Minh Chính rơkâo kual ASEAN hăng India ăt pơbŭ đĭ tui atur bruă ngă hrŏm amăng gru grua hiam, mơnuih mơnam, ană mơnuih, pơđĭ kyar bruă rô nao rai dua bơnah jai hrơi kjăp kơtang hloh, hlom bom tui. Khua dêh čar ơi Phạm Minh Chính lăi pơtong, ƀơi dlông atur kơ tơlơi ngă hrŏm kjăp phik, lir hơbit sui thun, kual ASEAN čang rơmang hrŏm hơbit hăng dêh čar India, dêh čar jĕ giăm amăng kual, kah hăng sa čô gơyut tơpă laih anun bơnah ngă hrŏm tong ten hlom bom, djru hrŏm hur har biă mă kơ bruă pơgang tơlơi rơnuk rơnua, hơđong, ngă hrŏm pơđĭ kyar pơdrong sah, hơđong na nao kơ rim bơnah, amăng kual laih anun ƀơi rŏng lŏn tơnah. Lăi pơtong nao kơ bruă ngă giăng mah yôm phara hlom bom plah wah kual ASEAN hăng India, Khua dêh čar rơkâo dua bơnah pơtrut bưp nao rai lu hloh, ngă hrŏm kiăng akŏ pơjing tơlơi đăo kơnang, pơsir djop tơlơi dŏ bơrơsua hăng tơlơi rơnuk rơnua, bong glăi hăng tơlơi lông lăng hrŏm, pơpŭ kơ tơlơi phiăn jar kmar.

Khua dêh čar ơi Phạm Minh Chính dong yua tơlơi pơčeh phrâo mơ̆ng dêh čar India kah hăng ngă hrŏm pơkra apui yua hăng pơ-iă yang hrơi, khul ngă hrŏm ba yua apui yua, ia săng jâo hăng sinh học, khul ngă hrŏm čuk pơkra jơlan dưi kjăp bong glăi hăng tơlơi truh lŏn adai ngă, ăt kah hăng rơkâo dêh čar India djru pơkra ia jrao pơjrao duăm ruă.