VOV4.Jarai-Tlam mơmŏt lơ 20/1, ƀơi Hà Nội, ơi Phạm Minh Chính Khua dêh čar nao jơnum jao pri apah bơni boh thâo ia rơgơi phrâo rŏng lŏn tơnah anăn VinFuture (VinFuture Prize) tal sa. Jơnum  jao pri VinFuture lĕ pơtum lu mơnuih rơgơi kơhnâo hmư̆ hing amăng rŏng lŏn tơnah hăng pôr pơthâo ia rơgơi pơčeh phrâo pơdjơ̆ nao kơ hơdôm klăk čô mơnuih, amra ba Việt Nam jing anih phun kơsem min boh thâo ia rơgơi, pơhưč tơlơi đing rai mơ̆ng rŏng lŏn tơnah lăng kơ Việt Nam. Tơlơi jơnum anai, djru pơđĭ tui kơnuih Việt Nam jing anih amra rai ĕp lăng mơ̆ng ƀing mơnuih rơgơi kơhnâo pơčeh phrâo tar ƀar rŏng lŏn tơnah, laih dơ̆ng ngă gêh găl pơtruh nao rai, pơjing tơlơi ngă hrom ƀơi anăp mơta, ngă hrom lu bơnah dêh čar, mơnuih rơgơi kơhnâo jar kmar hăng Việt Nam.

Mơ̆ng tal ƀơk pri blung a anai mơtam, VinFuture hơmâo pơhưč lu mơnuih ƀing rơgơi kơhnâo amăng rŏng lŏn tơnah hăng rơbêh 1.200 čô mơnuih čih anăn rai mơ̆ng 654 boh sang hră gưl prong hmư̆ hing, 51 boh sang bruă kơsem min ia rơgơi ăt hmư̆ hing mơ̆n, 42 boh sang bruă kơsem min rơgơi hloh lu mơta bruă gưl dêh čar hơmâo kơnuih hing ang amăng rŏng lŏn tơnah. Pri apah bơni anai hơmâo tŭ mă 599 kơčăo bruă pơplông pioh ruah ƀơk pri.

Nay Jek: Pơblang