VOV4.Jarai - Tlam lơ 12/10 pơphun Jơnum khua mua đah kơmơi kual ASEAN tal dua hơmâo lu khua mua mơng hơdôm boh dêh čar kual ASEAN hăng khua mua đah kơmơi, ƀing bơwih ƀong huă đah kơmơi mơng hơdôm boh dêh čar kual ASEAN hăng dêh čar ngă gŏp. Anai lĕ mông jơnum tŏ tui tơdơi kơ Jơnum khua mua đah kơmơi kual ASEAN tal blung a pơphun amăng thun 2020 yua Việt Nam, dêh čar git gai ASEAN pơphun. Jơnum kiăng pơčrông gưl prong hloh kơ bruă bơkơnar đah rơkơi đah kơmơi hăng pơhlôm tơlơi dưi mơng đah kơmơi, mơng anun lăng đah kơmơi lĕ akŏ phun amăng tơlơi gir run ngă hrŏm hăng pơjing kual ASEAN.

Khua dêh čar ơi Phạm Minh Chính nao jơnum khua mua đah kơmơi ASEAN tal 2

Khua dêh čar Kur ơi Hunsen, Khua dêh čar Việt Nam ơi Phạm Minh Chính hrŏm hăng khua mua pơprong lăng yôm hơdôm bruă mă truh kih mơng tơlơi pơčeh phrâo, lăng anai lĕ tơlơi akŏ phun pơdah tơlơi pơpŭ yôm kơ ƀing đah kơmơi amăng pơđĭ kyar bơwih ƀong huă - mơnuih mơnam amăng kual hăng tơlơi ƀuăn mơng ASEAN amăng pơtrut bơkơnar đah rơkơi đah kơmơi. Đĭ pơhiăp amăng mông Jơnum, Khua dêh čar ơi Phạm Minh Chính pơsit tong tơlơi gơgrong hăng tơlơi gum pơgôp yôm phăn mơng  ƀing bơwih ƀong sĭ mơdrô đah kơmơi amăng hơkrŭ glăi hăng pơđĭ kyar bơwih ƀong huă ƀơi Việt Nam hăng amăng kual. Khua dêh čar ăt pơsit tong tơlơi ƀuăn mơng Việt Nam amăng ngă hrŏm hăng hơdôm boh dêh čar ASEAN kiăng pơtrut bơkơnar đah rơkơi đah kơmơi hăng pơhlôm tơlơi dưi brơi đah kơmơi, pơgôp amăng tơlơi hơdip pơgi kơdih jai hrơi hơđong kjăp, abih bang hăng ngă pô amăng kual hăng rŏng lŏn tơnah.

VOV/Siu Đoan: Pơblang