VOV4.Jarai-Ƀrô hơdor glăi 60 thun hrơi gru gua tơhan pơlih mơnuih ƀôn sang hăng tŭ mă tơlơi bơni mi đai Hồ Chí Minh pơphun mơmŏt lơ 17/7 ƀơi Hà Nội, Khua dêh čar ơi Phạm Minh Chính mơ-it hiăp pơpŭ bơni hiam hloh kơ ƀing khua mua hăng mơnuih apăn bruă laih anun ling tơhan tơhan pơlih gah kông an mơnuih ƀôn sang, tơhan pơlih mơnuih ƀôn sang Việt Nam jing ƀing djă pioh bruă mă khin hơtai blah ayăt lông lăng amăng rơnuk phrâo.

Đĭ pơhiăp ƀơi mông jơnum, ơi Phạm Minh Chính Khua dêh čar ta lăi pơtong, lơ̆m blah ngă hăng brŭ prong gah tơhan pơlih mơnuih ƀôn sang hơmâo pơƀuh kơ pran jua mă bruă dơlăm tong ten, sit nik hăng ping gah, kơnuk kơna laih anun mơnuih ƀôn sang, hăng jơlan hơdră mơnuih mơnam ngă khua pô Xã hội chủ nghiã. Pơ anăp anai, tơlơi pơhing rŏng lŏn tơnah hăng amăng kual hơmâo lu tơlơi lông lăng, tơlơi gêh găl hăng tơnap tap lŭk puk. Hăng tơlơi gơgrong ba, bruă mă phun, khua dêh čar ta rơkâo tơhan pơlih mơnuih ƀôn sang khom thâo hluh dơlăm tơlơi pơhing, gir run mă bruă pơblih phrâo tơlơi pơmin, bruă mă, pơjing rai pran kơtang, pơsir tơlơi tơnap tap dŏ kơƀah, anŏ aka ƀu klă ngă tui giong hơdôm bruă jao mơ̆ng khua dêh čar hơmâo lăi pơthâo.

Nay Jek: Pơblang