Đĭ pơhiăp amăng mông bưp, ƀơk gơnam hơdôm grup hyu ĕp, klơi pơƀut glăi tơlang tơleh tơhan djai pơsăn drơi mơng Quân khu 9, Khua dêh čar ơi Phạm Minh Chính pơsit tong Ping gah, Kơnuk kơna amra tŏ tui ngă abih pran jua, pơƀut djop anih anom kơđi čar hăng mơnuih mơnam kiăng ngă tŭ yua ƀiă dong bruă hyu ĕp, klơi pơƀut hăng ĕp lăng anăn apăn tơhan djai pơsăn drơi, kiăng “ƀu brơi tơhan hơpă ôh wơr hĭ, ƀu brơi sang anŏ tơhan hơpă dŏ tơguăn sui đơi”.

Khua dêh čar čang rơmang hăng đăo gơnang hăng gru grua hiam klă “mơñum ia hơdor kơ pô klơi”, “ƀong boh hơdor kơ pô pla”, hăng tơlơi gir run prong hloh hăng tơlơi dong yua mơng Ping gah, mơnuih ƀôn sang, ling tơhan, pơ anăp anai, ling tơhan hyu ĕp, klơi pơƀut tơlang tơleh tơhan djai pơsăn drơi amra tŏ tui pran gơgrong hăng hơdôm tơlơi găn rơgao hlâo anun, gir run găn rơgao tơnap tap, tơlơi lông kiăng pơgiong klă bruă jao; pơgôp ngă tơdu ƀiă tơlơi sat pioh glăi mơng rơnuk blah wang, ngă tui djơ̆ bruă jao hăng ƀing djai pơsăn drơi yua kơ tơlơi rơnuk rơnua, rơngai, pơlir hơbit lŏn ia ta.