Lơ 07/08, ƀơi Ƀirô mă bruă Gong gai dêh čar, Khua dêh čar ta ơi Phạm Minh Chính git gai mông jơnum Gong gai dêh čar tui tơđar blan 7. Jơnum hmâo pơphun lăng nao rai mơ̆ng ataih hăng 34 bôh tơring čar, ƀôn prong. Amăng mông jơnum, Khua dêh čar ta ơi Phạm Minh Chính lăi rơđah, đơ đam dêh čar hmâo pok pơhai mă yua hơdră gong gai 2 gưl; Pơtrut pơđĭ kyar bơwih ƀong mơ̆ng 8,3% hăng bŏng glăi hăng hơdră bruă mă jia phrâo mơ̆ng dêh čar Mi; Pok pơhai khut khăt “pă bơnah phun” tui hơdôm Tơlơi pơtrun pơsit mơ̆ng Ding jum kơđi čar; Prăp lui Jơnum Ping gah hơdôm gưl, anăp nao Jơnum Ping gah tal 14; Pơphun hơdor glăi 78 thun Hrơi pioh kơ Ling tơhan rơka ruă hăng pơsăn drơi hăng prăp lui klă kơ Jơnum prong 80 thun hrơi Pơdŏng pơjing lŏn ia...; Pơgang pơgăn ayuh hyiăng pơplih ngă, pơgang tơlơi hơdip, kông ngăn mơnuih ƀôn sang, hơkrŭ pơsir tañ hloh anô̆ răm rai.

Amăng hơdôm hrơi tơnap tap, kơnang kơ tơlơi gir run mơ̆ng abih bang glông bruă kơđi čar, tơlơi bơwih ƀong mơnuih mơnam hmâo jơlan gah klă dong, blan dơi klă hloh blan hlâo, yap hrŏm 7 blan thun anai klă hloh bơhmu hăng thun 2024. Khă hnun hai, Khua dêh čar ăt črâo rơđah mơn hơdôm tơlơi tơnap tơlơi lông; hrŏm hăng anun rơkâo hơdôm ding jum gơnong bruă tơring čar, ƀôn prong pok pơhai dong hơdôm bruă pơsir ngă phrâo hơdôm bruă pơtrut pơđĭ kyar pioh djơ̆ tui tơhnal pơkă mơ̆ng 8,3-8,5% amăng thun 2025. Pơsit bruă hrŏ trun hră pơ-ar bruă čar, ngă gal brơi kơ anom bơwih ƀong, mơnuih ƀôn sang pơđĭ kyar bơwih ƀong mơ̆ng pô./.