Mơmŏt lơ 6/8, Khua mir sir ơi Lương Cường  hăng bơnai ñu hrŏm hăng khua mua pơprong dêh čar Việt nam nao truh laih pơ plơi prong jưh jom Luanda, pơphun nao čuă gưl kơnuk kơna pơ dêh čar Angola tui tơlơi jak iâu mơng Khua mir sir ơi João Manuel Goncalves Lourenco hăng bơnai ñu. Anai lĕ tal nao čuă gưl prong hloh mơng khua mua dêh čar Việt nam dong mơng thun 2008. Tal nao čuă mơng Khua mir sir ơi Lương Cương pơphun krĕp hrơi dua bơnah pioh hơdor glăi 50 thun akŏ pơjing tơlơi rô nao rai pơtom hiăp.

Him lăng dong mơng lơ 6-8/8, Khua mir sir ơi Lương Cường amra hơmâo mông bơkơtuai gưl khua mua pơprong hăng Khua mir sir ơi João Manuel Goncalves Lourenco; bưp Khua git gai pơ ala mơnuih ƀôn sang dêh čar Carolina Cerquera; mă bruă hăng khua mua Ping gah mơnuih ƀôn sang pơklaih rơngia Angola; bưp mơnuih ƀôn sang Việt Nam ƀơi dêh čar Angola hăng nao ngă lơphet hơdor glăi 50 thun akŏ pơjing tơlơi rô nao rai pơtom hiăp kơplah wah dua boh dêh čar. Sit biă ñu, Khua mir sir amra đĭ pơhiăp yôm phăn ƀơi Ƀirô Khua pơ ala mơnuih ƀôn sang dêh čar Angola, mơng anun lăi pơthâo hơdră bruă kơ sa boh dêh čar Việt Nam čang rơmang pơgôp prong ƀiă dong bruă kơđi čar amăng rŏng lŏn tơnah, tơlơi bơwih ƀong hăng tơlơi hơdip hiam klă kơ ană mơnuih.