Ƀơi mông bưp, Khua mir sir ơi Lương Cường pơsit, Việt Nam lăng yôm bruă pơđĭ tui tơlơi rô nao rai giăng mah hăng ngă hrŏm amăng lu bruă hăng dêh čar Êjip, laih anun čang rơmang tơlơi rô nao rai anai amra kơtang hloh, kjăp hloh, sit nik hăng tŭ yua hloh. Lăng yôm hơdôm tơlơi gêh gal ngă hrŏm hăng Êjip hăng kual Ơi Jŭ, Khua mir sir ơi Lương Cường kiăng pơđĭ tui bruă jơnum pơbưp khua mua prong hăng djŏp gưl, čih pơkra tơlơi phiăn phrâo či ngă bruă, ngă gêh gal brơi bruă ngă hrŏm dua bơnah amăng djŏp bruă mă.

Khua mir sir kiăng dua bơnah pơtrut tui dong bruă ngă hrŏm, pơphô, pơtô brơi hăng dong yua tơdruă amăng djŏp mông jơnum jar kmar hăng amăng kual, pơđĭ tui bruă jơnum pơčrông sai, lăi pơthâo boh thâo djă bong rơnuk rơnua, ngă gong jơlan bơmơak brơi, gum djru kiăng hơmâo tơlơi rơngai, hơđong amăng rim kual wơ̆t hăng ƀơi rŏng lŏn tơnah.