VOV4.Jarai - Đĭ pơhiăp amăng mông ngă lơphet pioh hơdor hrơi ƀing bơwih ƀong sĭ mơdrô Việt Nam lơ 13/10 hăng pơpŭ ƀing bơwih ƀong sĭ mơdrô Việt Nam ba gru pơphun amăng mơguah lơ 12/10, Khua dêh čar ơi Phạm Minh Chính mơ-it nao tơlơi pơpŭ hiam klă hloh kơ ƀing bơwih ƀong sĭ mơdrô Việt Nam, pơpŭ ƀing bơwih ƀong sĭ mơdrô Việt Nam jai hrơi jai pơđĭ kyar prong kơtang, tŏ tui gum pơgôp lu dong amăng bruă pơjing lŏn ia Việt Nam pơđĭ kyar, pơdrông asah. Ră anai Việt Nam hơmâo giăm 900 rơbâo anom bơwih ƀong sĭ mơdrô glăk mă bruă. Ƀing bơwih ƀong sĭ mơdrô amăng đơ đam dêh čar truh hơdôm klăk čô mơnuih. Pơgôp rơbêh 60% GDP, giăm 30% mrô mơnuih mă bruă ƀơi anai.

Khua dêh čar čơphĭn rup hrŏm abih bang

Đĭ pơhiăp amăng mông jơnum, Khua dêh čar ơi Phạm Minh Chính pơsit tong, Kơnuk kơna amra tŏ tui pơjing, pơgiong hơdră bruă, kơtưn amăng pơtom hiăp, lêng gum hrŏm, đing tơngia hmư̆, pơlăi nao rai, pơsir hĭ hơdôm tơlơi tơnap tap, gun găn, tơlơi rơkâo mơng anom bơwih ƀong sĭ mơdrô. Gah anom bruă, ƀing bơwih ƀong sĭ mơdrô Việt Nam, Khua dêh čar čang rơmang tŏ tui bơkơtưn mơng gơnam tam, bruă bơwih bơwang, pơgôp pơđĭ kyar bơwih ƀong huă-mơnuih mơnam amăng lŏn ia.

Amăng mông pơpŭ, Khua dêh čar ơi Phạm Minh Chính jao hră pơpŭ brơi 10 čô mơnuih bơwih ƀong sĭ mơdrô Việt Nam ba gru amăng thun 2022, Khul pơphun hơmâo jao hră pơpŭ brơi 6 čô mơnuih bơwih ƀong sĭ mơdrô hơmâo tơlơi gum pơgôp prong prin amăng pơgang klin Covid-19 hăng jao 60 pri brơi ƀing bơwih ƀong sĭ mơdrô Việt Nam ba gru thun 2022.

VOV/Siu Đoan: Pơblang