VOV4.Jarai - Mơmot lơ 31/5, ƀơi Sang jơnum Ƀing čơđai Hà Nội, Khua dêh čar ơi Phạm Minh Chính nao pơhmư̆ hrơi pơphun Blan ngă bruă yua kơ ƀing čơđai hăng Pơphun bruă bơyan pơdơi prong 2022 hăng anăn: “Gum tơngan wai lăng, pơtô hăng pơgang ba ƀing čơđai” đah mơng jak iâu abih bang tơlơi gum djru mơng hơdôm khul grup kơđi čar - mơnuih mơnam, sang anŏ hăng mơnuih tơpuôl amăng bruă wai lăng čem rông, pơtô pơblang, pơgang ba ƀing čơđai. Mông jơnum hơmâo năng ai 1.200 čô khua pơ ala, amăng anun hơmâo giăm 700 čô čơđai pơ ala brơi rơbêh 25 klăk čô čơđai amăng dêh čar nao pơhmư̆ tom. Pơhiăp ƀơi mông jơnum, Khua dêh čar ơi Phạm Minh Chính bơni hơ-ơč kơ 700 čô čơđai ƀơi anih jơnum, hăng 25 klăk čô čơđai ƀơi dêh čar ta hrŏm hăng sang anŏ, nai pơtô hiam drơi jăn pran jua, hơmâo hrơi pơdơi mơ-ak, tŭ yua. Ƀrô hrơi Jar kmar pioh kơ ƀing čơđai lơ 1/6, Hrơi pơphun blan ngă bruă yua kơ ƀing čơđai hăng Pơphun bruă bơyan pơdơi prong 2022, Khua dêh čar ơi Phạm Minh Chính hăng khua hơdôm ding jum, amom bruă hăng khua mua Jơnum min mơnuih ƀon sang ƀon prong Hà Nội hơmâo nao čuă čơđai duam ruă đih pơ sang ia jrao pơjrao mơnuih ruă Ung thư hăng ƀing čơđai glăk pơjrao mă glăi pran jua tơdơi kơ ƀă klin Covid-19 ƀơi Sang ia jrao pơjrao čơđai Dêh čar.

Siu H’Mai: Pơblang