Hăng anăn ñu: “Bơkơtưn đĭ rơnoh, pơplih phrâo pơjing khul Kông ang mơnuih ƀôn sang sit nik klă hiam, kơjăp kơtang, djơ̆ phiăn pơkă, hơdeč hmar, rơnuk anai”, Jơnum Bơkơtưn “Yua kơ rơnuk rơnua Lŏn ia” tal 9 yua kơ Ding jum Kông ang pơphun amăng mơmot (6/8), ƀơi Hà Nội. 246 čô mơnuih ba gru hlâo mơbruă, pơ ala brơi ha rơbâo čô mơnuih mơbruă pơplih phrâo, ha rơbâo gru “mơnuih klă, mă bruă klă” amăng bruă pơphun bơkơtưn “Yua kơ tơlơi rơnuk rơnua Lŏn ia” hăng Bruă pơphun “Abih bang mơnuih ƀôn sang pơgang lŏn ia nao pơhmư̆ mông Jơnum.

Pơhiăp amăng mông Jơnum, Khua dêh čar ta ơi Phạm Minh Chính pơtŏng sit, hơdôm truh kih, bôh tơhnal, bôh than hmâo rơđah mơ̆ng Khul Kông ang mơnuih ƀôn sang hmâo djru yôm phăn djă pioh kơjăp hơđong bruă kơđi čar, pơjing mơnuih mơnam jai hrơi jai rơgơi mơbruă, pơhlôm klă, tâ̆o yâo, tơlơi hơdip mơda mơ̆ng Mơnuih ƀôn sang rơnuk rơnua, yâo mơ-ak, trơi pơđao, pơjing anih anom gêh gal kơ pơđĭ kyar lŏn ia. Hăng lu hơdră, pơčeh phrâo klă, Bruă bơkơtưn “Yua kơ rơnuk rơnua Lŏn ia” hmâo pơtrut kơtang biă tơlơi pơplih phrâo, pơčeh phrâo, pok pơhai hơdôm jơlan gah rơnuk rơnua pơplih tañ, ba glăi bôh tơhnal; djru ngă giong bruă pơgang rơnuk rơnua, hơđong; pơtrut tơlơi gum hrŏm prong, klă mơ̆ng abih bang glông bruă kơđi čar, mơnuih ƀôn sang amăng pơgang Lŏn ia. Khua dêh čar rơkâo Khul tơhan Kông ang mơnuih ƀôn sang ngă tui dong phiăn juăt, gum hrŏm hơbit, bơkơtưn ngă klă bruă jao pơjing akô̆ phun rơnuk rơnua mơnuih ƀôn sang, djă kơjăp bruă pơgang rơnuk rơnua mơnuih ƀôn sang nao hrŏm hăng pran gơgrong kơjăp mơ̆ng mơnuih ƀôn sang; pơhlôm khut khăt rơnuk rơnua bruă kơđi čar, hơđong, pơhlôm mơnuih mơnam, djă pioh plơi pla rơnuk rơnua, hơđong pioh pơđĭ kyar lŏn ia./.