Amăng jơlan hơdră nao čuă sit nik dêh čar Singapore, mơguah lơ 10/2, Khua dêh čar ơi Phạm Minh Chính hơmâo nao pơhmư̆ mông Jơnum bơkơtuai anom bơwih ƀong Việt Nam - Sigapore hơmâo khua mua mơng hơdôm ding jum, anom bruă amăng Kơnuk kơna, hơdôm anom bruă hăng lu anom bơwih ƀong mơng dua bơnah dêh čar. Ƀơi mông jơnum, ƀing khua lăi nao lu tơlơi ngă hrŏm yôm Việt Nam - Singapore pơđĭ kyar hmar, kơtang amăng djŏp bruă. Thun 2023 anai, dua boh dêh čar ngă lơphet hơdor 50 thun akŏ pơdong tơlơi pơtom hiăp hăng 10 thun akŏ pơdong bruă Ngă hrŏm yôm phun.

Pơhiăp ƀơi mông jơnum, Khua dêh čar ơi Phạm Minh Chính brơi thâo, thun 2023, Việt Nam hăng Singapore ngă lơphet 50 thun hrơi akŏ pơdong bruă pơtom hiăp, 10 thun ngă hrŏm yôm Việt Nam - Singapore, 100 thun hrơi tơkeng Khua dêh čar hơđăp rơgŏm ơi Lý Quang Diệu. Găn rơgao 50 thun rô nao rai, ngă hrŏm, dua boh dêh čar Việt Nam - Singapore thâo hluh nao rai hloh, đăo gơnang hloh; ngă hrŏm amăng djŏp bruă sit nik, tŭ yua hloh; jing atur pơtrut tui tơlơi ngă hrŏm, anăp nao hơdôm tơlơi ngă hrŏm phrâo; gum djru amăng tơlơi rơngai, hơđong kơjăp, pơđĭ kyar amăng kual hăng ƀơi rŏng lŏn tơnah.