VOV4.Jarai - Mơguah lơ 22/8, ƀơi Hà Nội, Khua dêh čar ơi Phạm Minh Chính nao pơhmư̆ mông Jơnum lăi pơthâo rơđah hăng pơphun ngă Tơlơi pơtrun mrô 08 mơng Ding jum kơđi čar kơ bruă pơđĭ kyar boh thâo măi mok ling tơhan truh thun 2030 hăng hơdôm thun pơ anăp dong, yua Ping gah khul ling tơhan - Ding jum Ling tơhan pơphun. Pơhiăp git gai mông jơnum, ơi Phạm Minh Chính lăi, Tơlơi pơtrun mrô 08 pơdah tơlơi lăng ba dlăm, tơlơi čang rơmang prong hăng tơlơi đăo gơnang mơng Ping gah, Kơnuk kơna hăng Mơnuih ƀon sang hăng bruă pơkra boh thâo măi mok gah ling tơhan, biă ñu lĕ pơsit brơi bruă akŏ pơjing Khul tơhan truh thun 2025 ngă bruă rơgơi, hơdeč, kơjăp, gir truh thun 2030 akŏ pơdong Ling tơhan apăn bruă, rơgơi hloh. Laih dong, bruă ngă tui Tơlơi pơtrun mrô 08 ăt pơtrut tui bruă mă yua boh thâo măi mok phrâo, pơplih phrâo lŏn ia, akŏ pơdong tơlơi bơwih ƀong wai lăng mă hơjăn; mut hrŏm hăng jar kmar dlăm tui, sit nik hăng tŭ yua hloh mơn.

Siu H’Mai: Pơblang