VOV4.Jarai-Ăt amăng hơdră nao čuă jơmư, pơpŭ thun phrâo ƀơi tơring čar Thanh Hóa ƀrô čơkă têt thun anai djuai ania ta, thun Nhâm Dần 2022, mơguah lơ 25/1, ơi Phạm Minh Chính Khua dêh čar hăng grup hyu mă bruă mơ̆ng Gơnong dlông, nao čuă, pơpŭ thun phrâo, ră ruai hăng ding kơna khul ngă hrom CLB Hàn Rồng.

Anai lĕ, anih pơƀut ƀing tha rơma ngă hơkrŭ đưm, ƀing khua mua pơprong mơ̆ng Ping gah, kơnuk kơna, ling tơhan dêh čar ta glăi pơdơi abih thun bruă dŏ amăng plơi prong Thanh Hóa. Khua dêh čar rơkâo, tơring čar Thanh Hóa ăt ngă gêh găl kơ khul ngă hrom anai mă bruă, jai hrơi tŭ yua, djă pioh gru grua anăn “ia krông Mã khin hơtai”, djru hrom bruă mă amăng tơring čar, man pơdong tơring čar Thanh Hóa jai hrơi pơđĭ kyar, jing tơring čar ba gru hlâo djop mơta, gum hrom man pơdong dêh čar hing ang, pơdrong asah, mơnuih ƀôn sang trơi pơđao yâo mơak.

Khua dêh čar rơkâo blung a lĕ, djop anom bruă ping gah, gong gai kơnuk kơna hăng djop sang bruă gleng nao kơ mơnuih ƀôn sang hăng ƀing mă bruă mơak thun phrâo ƀong têt rơnuk rơnua, hơđong, thâo pơkrem, khăp pơpŭ nao rai hiam klă.

Nay Jek: Pơblang