VOV4.Jarai - Tlam lơ 23/1, ƀơi tơring čar Vĩnh Long, Khua dêh čar ơi Phạm Minh Chính hăng Ding kơna Khul git gai Ping gah dêh čar ơi Võ Văn Thưởng hơmâo nao tŭi ñang, dưm guang bơnga ƀơi anih pioh hơdor Khua khul Khua ding jum ơi Phạm Hùng hăng nao hơ-ŭ kơ Khua dêh čar hơđăp ơi Võ Văn Kiệt. Khua dêh čar ta hrŏm hăng grup hyu mă bruă hơmâo nao dưm guang bơnga, tŭi ñang, pioh hơdôm mơnit hơ-ŭ kơ Khua khul Khua  ding jum ơi Phạm Hùng hăng Khua dêh čar ơi hơđăp Võ Văn Kiệt - dua čô khua rơgơi kơhnâo mơng plơi pla tơring čar Vĩnh Long hơmâo lu tơlơi gum pơgôp, tuh rơyuh pran jua amăng rơnuk blah wang pơklaih rơngai lŏn ia, hăng wai pơgang dêh čar ta. Ƀrô tal anai, Khua dêh čar hrŏm hăng grup hyu mă bruă hơmâo nao čuă hăng pơpŭ thun phrâo kơ ƀing kông nhơn ƀơi sang măi Hoà Phú, tơring glông Long Hồ, tơring čar Vĩnh Long; pơpŭ thun phrâo, ƀơk gơnam brơi hơdôm sang anŏ kơnuk kơn čem rông ba, sang anŏ ƀun rin, hơdôm sang anŏ bơbeč nao kơta mơng klin Covid-19 hăng jao 100 boh sang brơi hơdôm sang anŏ tơnap tap amăng tơring glông Vũng Liêm hăng Tam Bình.

Siu Đoan: Pơblang