VOV4.Jarai - Tơdơi kơ tal hyu sem lăng, Khua dêh čar ơi Phạm Minh Chính hăng khua mua ngă bruă tom khua mua git gai ƀon prong Hồ Chí Minh kơ tơlơi bơwih ƀong huă - mơnuih mơnam blan 7 hăng 7 blan akŏ thun laih anun hơdôm bruă tuh pơ plai yôm phun mơng ƀon prong. Lăi pơthâo glăi ƀơi mông ngă bruă, ơi Phan Văn Mãi, Khua Jơnum min mơnuih ƀon sang ƀon prong Hồ Chí Minh brơi thâo, rơnoh đĭ kyar GRDP 6 blan akŏ thun mơng ƀon prong đĭ 3,82%, amăng anun đĭ kyar 3 blan tal 2 lu hloh 3 wơ̆t pơhmu hăng 3 blan tal 1. Kơ bruă mă amăng hơdôm blan rơnuč thun, ƀon prong amra pơƀut ngă bruă, gir ngă 19 rơnoh pơkă bơwih ƀong huă - mơnuih mơnam mơng akŏ thun Jơnum min pơ ala mơnuih ƀon sang hơmâo pơsit. Laih anun gir amra dưi hơmâo rơnoh đĭ kyar kah hăng tơlơi kiăng lĕ 6 - 6,5%.

Pơhiăp ƀơi mông ngă bruă, hrŏm hăng bơni hơdôm tơlơi dưi ngă hmư̆ hing, Khua dêh čar ăt pơtă pơtăn kơ ƀon prong Hồ Chí Minh lăng glăi dong, pơsir hĭ tơlơi tơnap, pơklaih brơi tơlơi gun bruă pơkra gơnam sĭ mơdrô; lăng glăi abih bang, pơhrua tui hơdră pơsir akŏ pơdong gong gai plơi prong, pơplih phrâo anih tuh pơ plai, sĭ mơdrô; gir dưi ngă hăng ngă rơgao 19 rơnoh pơkă bơwih ƀong huă - mơnuih mơnam thun 2022. Khua dêh čar ăt jao bruă rơđah rơđông kơ khua mua, anom bruă đah mơng ngă hrŏm, pơsir tui tơlơi dưi hơmâo rơkâo đĭ mơng ƀon prong Hồ Chí Minh.

Siu H’Mai: Pơblang